Alter: 21-30
Wohnhaft in OF seit: 25 Jahre
Im Stadtteil: Bieber
Geschlecht: männlich
Mein Name soll genannt werden: kannste machen, musste abber ned.
Ich möchte Bilder zur Veröffentlichung zur Verfügung stellen: Nö.
Es gibt ein Buch „Offenbach-Liebe auf den zweiten Blick“, wo zeigt sich dieser zweite Blick? Was macht den Charme der Stadt Offenbach aus?
Woann isch des rischdisch verstäj, haast des doch, dass mär beim zweite Mol mäj sieht, als beim erschde Mol !?Wannde zum Beispiel Montags uff de Wilhelmsplatz guggschd, sieschde meist blos e Menge Audos. Dienstags, freitags unn samstags findet mär doa äwwer en tolle Wochenmarkt.
Odder die Kiggäss in ihrm Stadion… Ach nee, doa muschde schunn efder hinsäje, bisde doa mol woas ouschdännisches siescht.
Hast Du einen Geheimtipp?
Waaschde, wo die Feierwehr is ? Doa fährschde an de Aral reschts de Bersch nuf. Äjendwoann kummt uff de reschte Seid en Lidl. Doa fährschde oafach geradaus weider, bisde an de Jet vorbei kimmschd. Gäjeiwwer schdäjd en Blitzer. Doa muschde äwwer nedd zuggeln. Der blitzt blous in die oannere Rischtung. Wannde aus Froangfort kimmschd, muschde jetz uffbasse. Oam beschde die Aache zu mache. Do schdäjd nämlisch des Sparda Bank Stadion. Dord wärd allerdings alles oannere als gespart. Sou, glei bischde schunn doa. Uffde reschte Seid schdäjd schunn des Schild, vunn moim Geheimtipp. De Namensgeber issn goanz bekannte amerikanische Pop-Sänger. Jetz bischde nämlisch Just in Bieber. Vum Aussischtsturm hoaschde do en subber Blick uff die Stadt Offebach.Isch häbb äwwer aa noch en weitere Tipp, den isch moin Kumbels oft als Rotschloach geb, woannse mol werrer besoffe sin. Doa sag isch „Geh hoam“ (Geh-Hoam-Tipp)
Dein schönstes Erlebnis in OF?
Isch häbb emol moi Portemonnaie verlorn. Doann hot misch e Fraa angerufe unn gsoaht, dass sie 's gfunne hot. Des hot misch escht gfraad. Also nedd wäje dem Portemonnaie.
Äjehr, dass misch aa emol e Fraa angerufe hot unn gfroocht hot, ob isch vorbei kumm.
Dein schlimmstes Erlebnis in OF?
Die Endwiglung von nem Bürjerbüro zu säje. Vor wenige Johrn noch war isch iwwer demmsai Organisazion positiv iwwerrascht. Heit graut 's misch als werrer dord Erledigunge dorschzuführe. Loang Schlange, loang Wartezeite unn dodorsch veel genervte unn ufraindlisch Leit. Des ging och aa mol annerschd…
Wie würdest Du OF in drei Adjektiven beschreiben?
Knorke, baustellig, nonchalant.
Koaner benutzt scheisserer Adjektive als isch.
Fällt Dir ein Slogan für OF ein?
Offebach – Come in and find out. (Kimm nei un find widder naus)
Was würdest Du in OF gerne verändern? Was stört Dich am meisten in OF?
Als erschdes deed isch mol des Verkehrsschild “Grüne Well bei 50 km/h“ an de Autobahn-Ausfahrt Taunusring abhänge. Des ging mer schunn als uff de Sack. Zählt des blous fär ane Ampel ? Häwwe die oafach woas falsches gschrewwe unn 's haast “bei 150 km/h“ ? Doa deed isch zumindesst mol oafoangen. Isch will misch jetz äwwer aa nedd uffräje. Doa bekumm isch blous werrer Kreislauf.